રકાબીમાં બનાવો ક્લેના ગણપતિ

Source: Shefali Pandya 'Ami'

નકામી બાસ્કેટમાંથી જ્વેલરી બાસ્કેટ, કાચના ગ્લાસનું પેનસ્ટેન્ડ, મીઠાઇના ખોખામાંથી જ્વેલરી બોક્સ ગમે તે નકામી વસ્તુનો કલાત્મક ઉપયોગ કરવામાં નિપુણ આનલ ત્રિવેદી...

કોઇ પણ કલાને નાનપણથી જ જો થોડું જતન કરી કેળવવામાં આવે, તો વ્યક્તિ મોટી થઇને તેમાં પોતાનું નામ પ્રખ્યાત કરી શકે. અમદાવાદમાં રહેતાં આનલ ત્રિવેદી એવી યુવતી છે, જેને નાનપણથી જ ડ્રોઇંગનો શોખ ધરાવતાં હતાં.
તેઓ કહે છે, ‘મને મારા દાદી, મમ્મી-પપ્પા તરફથી નાનપણથી જ ઘણી પ્રેરણા મળી છે. તેઓ મને કંઇ ને કંઇ બનાવવા માટે પ્રેરિત કરતાં રહે. દાદી અને મમ્મી મને સતત આઇડીયા આપે કે આમાંથી આવી કંઇક વસ્તુ બનાવી શકાય. ક્યાંક કોઇના ઘરે સારું ઇન્ટિરિયર જોઇને આવે તો પણ મને કહે.’
પોતાના શોખને વિકસાવવાની સાથે આનલે અભ્યાસને પણ એટલું જ મહત્ત્વ આપ્યું છે. એ કહે છે, ‘મેં એમ.કોમ. કર્યું છે અને તે સાથે ડ્રેસ ડિઝાઇનિંગનો કોર્સ પણ કર્યોછે. સાથોસાથ મને એમ્બ્રોઇડરીનો પણ શોખ હોવાથી તે પણ શીખી છું.’ આનલ અત્યારે જોબ કરવાની સાથે ડ્રેસ ડિઝાઇનિંગ, હેન્ડવર્ક, મશીનવર્ક કરવા ઉપરાંત પોતાના વેસ્ટમાંથી બેસ્ટ બનાવવાના શોખને પણ પૂરો કરે છે.
એણે લગ્નમાં આપવા માટે ઉપયોગી એવા વિવિધ પ્રકારના બોક્સ, ગ્લાસમાંથી પેનસ્ટેન્ડ, વિવિધ સ્ટાઇલના પોટ, ક્લેવર્ક, ક્લેમાસ્ક, વગેરે અનેક વસ્તુ બનાવી છે. રકાબીમાં આકર્ષક ગણપતિ કઇ રીતે બનાવવા તે આનલ પાસેથી જ શીખીએ.
રકાબીમાં ગણપતિ બનાવવા માટે તમારે સૌથી પહેલાં જરૂર પડશે એક રકાબી, ક્લે, ફેવીકોલ, ફેવીક્રીલ કલર્સની. ક્લેમાં ફેવીકોલ ભેળવી તેને ગણપતિનો આકાર આપી એક દિવસ સુકાવા દો. પછી તેના પર તમને ગમતો કલર કરો.
રકાબીમાં તમને મનપસંદ કલર કરો અથવા ક્રેકલ મીડિયમથી કલર કરો. હવે રકાબીની બરાબર વરચે ક્લેના ગણપતિ ફેવીકોલથી લગાવી આજુબાજુ ગ્લિટરથી આકર્ષક ડિઝાઇન બનાવો. તમે ઇચ્છો તો રકાબીને ટિપોઇ પર મૂકો કે તેની પાછળ ડટ્ટો લગાવડાવીને વોલપીસ બનાવો.