લુક લાઇટ વિથ બ્લેક એન્ડ વ્હાઇટ

Source: Shefali Pandya 'Ami' |

ગોઠણથી સહેજ નીચે સુધી લંબાઇ ધરાવતાં સ્કર્ટ પર બ્લેક એન્ડ વ્હાઇટ લાઇનિંગવાળું સ્લીવલેસ ટોપ પહેરેલી યુવતીની અદા જોઇને ભલભલા ફિદા થઇ જાય કે નહીં?

મોસમ બદલાય એમ ફેશન અને કલર્સમાં પણ પરિવર્તન આવતું રહે છે. કલર્સમાં સામાન્ય રીતે ઉનાળો આવે એટલે સૌ લાઇટ કલરના પોશાક પહેરવાનું પસંદ કરે છે, પણ તેમાં બે કલર એવા છે જે ક્યારેય ઓફસીઝન થતાં નથી. આ બે કલર્સ છે - બ્લેક એન્ડ વ્હાઇટ. કોલેજગોઇંગ યુવતી હોય કે વર્કિંગ વુમન દરેકના વોર્ડરોબમાં આ બે કલર્સનું કોમ્બિનેશન અચૂક જોવા મળશે. ડ્રેસ, ટી-શર્ટ-પેન્ટ, સ્કર્ટ-ટોપ કે પછી સાડી જ કેમ ન હોય? બ્લેક એન્ડ વ્હાઇટ કલર્સ એવા છે કે કોઇને પણ જોતાંની સાથે જ આ કોમ્બિનેશન ગમી જાય.

સામાન્ય રીતે ઉનાળામાં લાઇટ કલરના પોશાક પહેરવાથી ગરમી ઓછી લાગે છે અને તેમાંય વ્હાઇટ કલરમાં તો ગરમીને શોષી લેવાની ક્ષમતા રહેલી હોવાને કારણે ટોપ, કુર્તી, ટી-શર્ટ વગેરે વ્હાઇટ રંગના પહેરવાનું યુવતીઓ પસંદ કરે છે. તેની સાથે બ્લેક સલવાર, લેગિંગ્સ, પેન્ટ પહેર્યા હોય તો તમે ફેશનેબલ લાગવાની સાથે સ્ટાઇલિશ પણ દેખાવ છો.

બ્લેક એન્ડ વ્હાઇટ કોમ્બિનેશનમાં ફ્રોક સ્ટાઇલ પણ સારી લાગે છે. જ્યારે કેટલીક યુવતીઓ ફૂલ બ્લેક ફ્રોક પર વ્હાઇટ લેસનો બેલ્ટ પણ બાંધે છે. તેમાંય મોડર્ન યુવતીઓ સ્પગેટી સ્ટાઇલના બ્લેક એન્ડ વ્હાઇટ કોમ્બિનેશનના ફ્રોક, ઇવનિંગ ગાઉન, સ્કર્ટ મીડી, વગેરે વિવિધ પોશાક પહેરે છે.

આમ તો વ્હાઇટ ટોપ, કુર્તી કે ટી-શર્ટ જ સારા લાગે અને તેના લીધે ગરમી પણ ઓછી લાગે, છતાં ઘણી યુવતીઓ બ્લેક ટોપ, કુર્તી કે શર્ટ પહેરી તેની સાથે બ્લેક એન્ડ વ્હાઇટ ઇવનિંગ ગાઉન, આ જ કોમ્બિનેશનનું લોંગ સ્કર્ટ પણ પહેરવાનું પસંદ કરે છે. જ્યારે લોંગ ટી-શર્ટમાં બ્લેક એન્ડ વ્હાઇટ પટ્ટા હોય એવી સ્ટાઇલના ટી-શર્ટ યુવતીઓને વધારે ગમે છે.

ઇવનિંગ ગાઉનમાં તો વળી ફૂલ ગાઉન ભલે બ્લેક હોય, તેમાં વચ્ચે વચ્ચે વ્હાઇટ બેકગ્રાઉન્ડમાં બ્લેક ડિઝાઇન હોય તેવી રીતે સીવવામાં આવતા હોવાથી આવા ઇવનિંગ ગાઉન એકદમ ડિફરન્ટ લુક આપે છે. તો વળી, ક્યારેક ઇવનિંગ ગાઉનને વ્હાઇટ લેસ કે પટ્ટી મૂકીને વચ્ચે લોંગ બેલ્ટ બાંધવાનો હોય છે.
જે સ્ટાઇલિશ લાગે છે.

બ્લેક એન્ડ વ્હાઇટનું કોમ્બિનેશન જ એવું છે કે કિડ્ઝવેરમાં પણ તે એટલા જ પોપ્યુલર છે. નાના બાળકોને તમે કોઇ પણ કલરના કપડાં પહેરાવો, તેઓ સુંદર તો લાગવાનાં જ. છતાં કિડ્ઝવેરમાં જ્યારે આ કોમ્બિનેશનનો ઉપયોગ થાય ત્યારે આવા ફ્રોક કે સ્કટર્-ટોપ પહેરેલી નાની બાળકી પણ સુંદર મજાની ઢીંગલી જેવી લાગે.

ઓફિસવેરમાં પણ આ કોમ્બિનેશન પરફેકટ લુક આપે છે. તો હવે તમારા વોર્ડરોબમાં એક નજર કરી જુઓ કે તમારી પાસે આ કોમ્બિનેશન છે કે નહીં? હોય તો વાંધો નથી, પણ જો ન હોય તો.... તો... તો તમે એટલા તો સમજદાર છો કે તમારે શું કરવું?

બ્લેક એન્ડ વ્હાઇટનું કોમ્બિનેશન ફેશનમાં ક્યારેય જૂનું નથી થતું. તે સિમ્પલ છતાં સોબર લુક પ્રદાન કરવાની સાથે તમારી પર્સનાલિટીને પણ એવી નિખારે છે કે બે ઘડી તો કોઇ પણ વ્યક્તિ જોતી જ રહી જાય. પેન્ટ હોય કે સ્કર્ટ બ્લેકની સાથે વ્હાઇટના કોમ્બિનેશનનો ગેટઅપ જ કંઇ ઓર લાગે છે.