સાદા પૂંઠામાંથી આકર્ષક કોટન ફાઇલ-ફોલ્ડર

Source: Shefali Pandya 'Ami'

સાદા પૂંઠા પર મનગમતા રંગનું કાપડ લગાવી, તેના પર ગોલ્ડન બોર્ડર, સ્ટોન કે ડાયમંડ લગાવીને સરસ મજાનાં ફાઇલ કે ફોલ્ડર તમે જાતે બનાવીને કોઇને ગિફ્ટમાં આપો તો એકદમ ‘યુનિક’ ગિફ્ટ લાગશે.

આજકાલ ઘણા ઘરમાં આપણે જોઇએ છીએ કે મડ-મિરરથી દીવાલને અલગ જ લુક આપેલો હોય અથવા તો હાર્ડબોર્ડ પર પેપરમેશીથી સુંદર મજાના ચાકળાની ડિઝાઇન બનાવેલી હોય. અમદાવાદના લીનાબહેન રાવલ આવા પેપરમેશીના વોલપીસ, મ્યૂરલ, દીવાલ પર મડવર્ક, ટાઇલ પર એમસીલવર્ક વગેરે ઘણા વર્ષોથી કરે છે. તે સાથે છેલ્લા ત્રણ વર્ષથી ક્લાસીસ પણ ચલાવે છે.

તેઓ કહે છે, ‘મને નાનપણથી જ આર્ટ અને ક્રાફ્ટમાં રસ હતો. તેમાંય પેઇન્ટિંગ કરવાનું તો મને ખૂબ ગમતું. કોમર્સની ડીગ્રી મેળવ્યા પછી મેં આર્ટ એન્ડ ક્રાફ્ટનો કોર્સ કર્યો અને વિવિધ વસ્તુઓ બનાવવાનું શરૂ કર્યું.’

મડ-મિરર વર્ક કરવાની સાથે લીનાબહેન કોટન કે જ્યૂટના ફાઇલ-ફોલ્ડર, જ્યૂટની હેન્ડબેગ, આર્ટિફિશિયલ જ્વેલરી, વગેરે પણ બનાવે છે. જ્યૂટ કે કોટનનાં ફાઇલ કે ફોલ્ડર તમે પણ બનાવી શકો. આના માટે ૧૬X૨૦ ઇંચનું પૂંઠું લો. તેના પર તમને ગમતા રંગનું કોટન કે જ્યૂટનું એ જ માપનું કપડું લો. ફાઇલની અંદર અસ્તર લગાવવા અને ખાનાં બનાવવા માટે સફેદ કે કાળા રંગના કાપડના ૧૬X૨૦, ૧૦X૨૦ અને ૬X૨૦ના ત્રણ ટુકડા લો.

ઉપરના રંગીન સાદા કાપડ પર તમને ગમતી લેસ લગાવો. પછી તેને પૂંઠા પર આગળના ભાગ પર અને અંદર ત્રણે માપના અસ્તરના કાપડ ગોઠવી સિલાઇ કરો. હવે પૂંઠાને વચ્ચેથી વાળીને સિલાઇ કરો. ૬ ઇંચના પૂંઠાની પટ્ટી લઇ તેના પર પણ અસ્તર લગાવી દો. પંચથી કાણા પાડી તેને ફાઇલની વચ્ચે સિલાઇ કરો. ફાઇલની ચારે બાજુએ ગોઠ લગાવી દો. ફાઇલ તૈયાર છે. તેના પર તમને ગમે તો પેઇન્ટિંગ કરો અથવા સ્ટોન, મોતી વગેરેથી પણ ડેકોરેશન કરી શકો.