પર્લ જ્વેલરીની શાન

Source: Shefali Pandya 'Ami'

પર્લ જ્વેલરી પ્રાચીનકાળથી પહેરવામાં આવે છે. દરેક પોશાક સાથે મેચ થાય એવી આ જ્વેલરી આજની આધુનિકાને પણ અત્યંત પ્રિય છે.

આધુનિકાઓને જ્વેલરી અંગે કયારેય કહેવું પડે એમ નથી હોતું. સોના, ચાંદી, ડાયમંડ વગેરેની જ્વેલરી તો દરેક યુવતી પહેરે જ છે, પણ જયારે વ્હાઇટ ડ્રેસ કે સાડી પહેરે ત્યારે તેની સાથે જો પર્લ એટલે કે મોતીની જ્વેલરી પહેરી હોય તો વધારે સુંદર લાગે છે. પ્રાચીનકાળથી મોતીનો ઉપયોગ જ્વેલરીમાં થાય છે અને તે દેખાવમાં અત્યંત ભવ્ય લાગે છે.

મૂળ તો દરિયામાંથી મળતા આ મોતી આકારમાં એટલા બધા સારા નથી હોતા, પણ કારીગરો મોતીને ગોળ, લંબગોળ, રાઇસ મોતી, ડ્રોપ જેવા વિવિધ અને મનમોહક આકાર આપે છે. આજકાલ વ્હાઇટ, ઓફવ્હાઇટ, યલો, પિંક, બ્લ્યૂ, વગેરે અનેકવિધ રંગના મોતી મળે છે.

તેમાંથી તમે ઇચ્છો એ રંગ અને આકારના મોતીની માળા, ઇયરિંગ્સ, બ્રેસલેટ કે વીંટી બનાવડાવીને પહેરી શકો છો. ડ્રેસ અને સાડી સાથે તો મોતીની જ્વેલરી અત્યંત આકર્ષક અને પરફેક્ટ મેચ લાગે છે.

મોતીની જ્વેલરી દરેક પ્રસંગે પહેરી શકાય છે. ઘણી યુવતીઓ વ્હાઇટ ડ્રેસ કે સાડી સાથે મોતીની જ્વેલરી પહેરવાનો આગ્રહ રાખે છે. તેમાંય મલ્ટિકલરના મોતીની માળા અને બ્રેસલેટ તો દરેક પરિધાન સાથે મેચ થઇ જતાં હોવાથી મોટા ભાગે વર્કિંગ વુમન અને કોલેજ ગોઇંગ યુવતીઓ તો મોતીની જ્વેલરી પહેરવાનું વધારે પસંદ કરે છે.

ઘણા લોકો માનસિક શાંતિ માટે પણ મોતીની વીંટી પહેરે છે. પર્લ જ્વેલરી દરેક મહિલાને શોભે છે. મલ્ટિકલર મોતીની જ્વેલરી દરેક પોશાક સાથે મેચ થઇ જતી હોવાથી વધુ લોકપ્રિય છે.