ગિફ્ટ સાથે શો-પીસ જેવો ડ્રાય ફ્લાવરનો બૂકે

Source: Shefali Pandya 'Ami'

ક્રિસ્ટલ કે સ્ટોન અને ફોઇલ પેપરમાંથી બનાવવામાં આવતા ડ્રાય ફ્લાવરનો બૂકે શોપીસ તરીકે અત્યંત સુંદર લાગે છે.

મૂળ દિલ્હીનાં અને ત્યાં જ મોટા થયેલાં સુષમા અગ્રવાલને નાનપણથી જ ક્રાફ્ટનો શોખ હતો. નકામા કાર્ડ, કંકોત્રીમાંથી વિવિધ પ્રકારના એન્વેલપ, કાર્ડ બનાવતાં સુષમાને માતા-પિતા તરફથી સારો એવો સપોર્ટ મળ્યો.

અભ્યાસની સાથોસાથ તેમણે પોતાની જાતે જ ફ્લાવર મેકિંગ, વિવિધ રીતનાં ગિફ્ટ પેકિંગ, ફેબ્રિક પેઇન્ટિંગ, એમ્બ્રોઇડરી વગેરે બનાવતાં શીખ્યાં. બી.એ.ની ડીગ્રી મેળવ્યાં પછી લગ્ન કરીને અમદાવાદ આવ્યાં.

અહીં આવીને તેમના શોખને પતિ તરફથી સારું પ્રોત્સાહન મળ્યું. તેઓ કહે છે, ‘લગ્ન પછી મારા શોખને પતિ તરફથી સંપૂર્ણ સહકાર મળ્યો છે. ક્યાંય એક્ઝિબિશન ભરાયું હોય કે કંઇ નોવેલ્ટી હોય તો મને તે ચોક્કસ બતાવે.

મારા બંને દીકરાઓને પણ મારી કલા ખૂબ ગમે છે.’ એ કહે છે, ‘આપણે કોઇને મેરેજ એનિવર્સરી, બર્થ-ડે કે કોઇ પ્રસંગે ફ્લાવર બૂકે આપીએ છીએ. એ બૂકેના ફૂલો એકાદ દિવસ માંડ તાજા રહે. સૂકાઇ જાય એટલે તેને ફેંકી દેવાને કારણે તેની કંઇ યાદ કે કિંમત નથી રહેતી. તેના બદલે મેં ડ્રાય ફ્લાવર બૂકે બનાવવાનું શરૂ કર્યું.

આમાં વાયર, પ્લાસ્ટિક, થર્મોકોલ વગેરેમાંથી બૂકે બનાવવામાં આવે છે. ઉપરાંત, તેમાં સ્ટોન, ક્રિસ્ટલ, રેઇનબો વાયર, મોતી, શાટિન, ગ્લિટર, કુંદન, લામસા, નેટ, વગેરેનો ઉપયોગ કરી આકર્ષક બૂકે બનાવી શકાય છે.

આવો બૂકે કોઇને ગિફ્ટ આપીએ તો તે ઘરમાં ડેકોરેટિવ શોપીસ તરીકે કામ લાગે છે અને જેને આપ્યો હોય તેને આપણી ગિફ્ટ યાદગીરી તરીકે પણ રહે છે. તેમાં અનેક વેરાયટી બની શકે છે.’

આવા ડ્રાય ફ્લાવરનો બૂકે તમે પણ બનાવીને કોઇને ગિફ્ટ આપી શકો છો. ક્રિસ્ટલનો ફ્લાવર બૂકે બનાવવા માટે પાંદડી શેપના ક્રિસ્ટલ, સફેદ કલરના ગોળ સ્ટોન, પાતળો સિલ્વર વાયર, જાડો વાયર, લીલા રંગના પાન, ફોઇલ પેપર, થર્મોકોલ ગ્લાસ લો.

સૌથી પહેલાં ક્રિસ્ટલમાં પાતળો વાયર પરોવી, તેને ફૂલ જેવો શેપ આપો. ત્યાર બાદ વચમાં સફેદ રંગનો સ્ટોન લગાવો એટલે ફ્લાવર તૈયાર થઇ જશે. આ રીતે તમે ઇચ્છો એટલા ફ્લાવર બનાવો. હવે જાડો વાયર લઇ તેમાં ઉપર વાયરને જોડી બંને બાજુએ ફ્લાવર લગાવી દો.

રીતે બધા ફ્લાવર એક વાયરમાં જોડો. તે પછી તેને લીલા રંગના પાન અને ફોઇલ પેપરથી ડેકોરેટ કરો. કાચના ગ્લાસમાં થર્મોકોલનો ટુકડો માપ પ્રમાણે કાપી તેના પર કલર કરો. તેને ગ્લાસમાં ભરાવી ફ્લાવર લગાવેલા તારને તેમાં ખોસી દો.

આ રીતે ક્યાંક ક્યાંક સિલ્વર કલરના વાયરને પણ ગોળ વાળીને ભરાવી દો. બસ, આકર્ષક ડ્રાય ફ્લાવરનો બૂકે તૈયાર છે. તેને ઘરમાં સજાવો અથવા કોઇને ગિફ્ટ પણ આપી શકો.