ઘરમાં સુખશાંતિ લાવે આકર્ષક વાસ્તુફ્રેમ

Source: Shefali Pandya 'Ami' |

એક વર્ષ વકીલાતની પ્રેક્ટિસ કરી, પણ મને લાગ્યું કે આનાથી મારા શોખ સાથે હું અન્યાય કરી રહી છું. તેથી મેં પ્રેક્ટિસ છોડીને મારા શોખને વિકસાવવાનું નક્કી કર્યું.

ઘરનાં કોર્નરમાં સરસ મજાનો વોટર ફાઉન્ટન ગોઠવેલો હોય અને તેમાંથી ખળખળ કરતું પાણી વહેતું હોય તો એ જોઇને મન ખુશ થઇ જાય ને? આવા આકર્ષક ફાઉન્ટન તેમ જ અનેકવિધ પેઇન્ટિંગ્સ, મ્યૂરલ્સ, જાતજાતની કેન્ડલ, કેલિગ્રાફી વગેરે બનાવવામાં નિપુણ અમદાવાદનાં અનંતા છેલ્લા દસ વર્ષથી આ બધું શીખવવાના ક્લાસીસ પણ ચલાવે છે.

અનંતા કહે છે,‘મને નાનપણથી જ આવી બધી વસ્તુઓ બનાવવાનો શોખ તો હતો, પણ મારા મમ્મી-પપ્પાને મન અભ્યાસનું મહત્વ વધુ હતું. આથી મેં પહેલાં મારો અભ્યાસ પૂરો કરવાનું નક્કી કર્યું અને બી. કોમ. પાસ કર્યું. તે પછી એલએલ.બી. પાસ કરી અને એક વર્ષ પ્રેક્ટિસ કરી.

હા, મારા પપ્પા મને પહેલાંથી હેન્ડીક્રાફ્ટની વસ્તુ બનાવવા માટે બુક્સ કે જે વસ્તુ જોઇએ તે લાવી આપતાં. જો કે મમ્મીનો આગ્રહ એવો રહેતો કે પહેલાં અભ્યાસ પૂરો કરવો.’

પેઇન્ટિંગ્સમાં અનંતાએ ફેબ્રિક પેઇન્ટિંગ, નિબ પેઇન્ટિંગ, કેન્વાસ પેઇન્ટિંગ, ડ્રાય પેસ્ટલ કલર્સથી પેઇન્ટિંગ જેવા વિવિધ પેઇન્ટિંગ બનાવ્યાં છે, તો ક્રાફટમાં તેઓ કેન્ડલ્સ બનાવે છે. આમાં તેઓ કોતરણીવાળી કેન્ડલ, પાઉડર વેક્સ, કોલ્ડ વેક્સ વગેરે કેન્ડલ બનાવે છે.

નાના બાળકો કેન્ડલ બનાવતાં દાઝી ન જાય તે માટે તેમને કોલ્ડ વેક્સથી કેન્ડલ બનાવતાં શીખવે છે. તે કહે છે,‘મેં માત્ર નિબ કેલિગ્રાફીના જ ક્લાસીસ ભર્યા છે. તે સિવાયની તમામ વસ્તુઓ હું જાતે જ બનાવતાં શીખી છું. ક્યારેક કોઇ ફ્રેન્ડ સાથે ફાઇન આર્ટ્સની કોલેજમાં જઇને જોઉ કે કેવી રીતે પેઇન્ટિંગ્સ, મ્યૂરલ્સ કે ક્રાફ્ટ બનાવવામાં આવે છે.’

અનંતાએ અનેક વોલપીસ પણ બનાવ્યાં છે, તેમાં વાસ્તુફ્રેમ તો એવી છે, જે જોતાંની સાથે ગમી જાય અને ઘરમાં સુખ-શાંતિ રહે. આવી ફ્રેમ તમે પણ બનાવી શકો. તે માટે ચિત્રમાં બતાવ્યા પ્રમાણે લાકડાંને કટિંગ કરો. ત્યાર બાદ તેના પર શુભ ચિહ્નો ડ્રો કરો. એમસીલને મિક્સ કરી તેને આ ચિહ્નો પર લગાવી એમ્બોઝ કરો. તે સૂકાઇ જાય એટલે જે તે ચિહ્ન પ્રમાણે તેના પર એક્રેલિક કલર કરીને સૂકાવા દો.

તેના પર થ્રી-ડી વર્ક, કોનવર્ક કરો અને બરાબર સૂકાઇ જાય એટલે વાર્નિશ કરી દો. આ ફ્રેમને ઝીણી ઘંટડી, લેસથી ડેકોરેટ કરી દીવાલ પર લગાવો.